CEBU, Philippines - Gipang apud-apod na sa siyudad sa Sugbu ang 24 ka mga sakyanan alang sa mga barangay kapitan sa siyudad.
Ang mga sakyanan gilangkoban og Toyota Hilux ug Innova ug giapod ngadto sa mga kapitan sa barangay Agsungot, Babag, Basak San Nicolas, Busay, Cambinocot, Day-as, Duljo Fatima, Kalubihan, Lusaran, Mabini, Pamutan, Paril, Pung-ol Sibugay, San Jose, Sawang Calero, Sta. Cruz, Sudlon 1, Taptap, Buhisan, Luz, Pit-os, San Antonio, Sinsin ug Zapatera.
Si Mayor Michael Rama maoy nangunay sa pag-turn over sa mga sakyanan ug miklarong walay gipalabi ang iyang administrasyon kun si kinsay hatagan sa maong mga sakyanan. Dunay 80 ka barangay ang siyudad.
Giklaro sa mayor nga mao pa lang kini ang unang batch sa mga sakyanan alang sa mga barangay kapitan aron duna silay magamit sa ilang mga opisyal nga mga lakaw. Matud pa sa mayor nga gamit kaayo ang maong mga sakyanan sanglit ang mga opisyales sa barangay maoy una nga dangpanan sa mga tawo panahon sa emerhensya.
Samtang ang kapitan sa barangay Taptap nga si Florentina Malazarte misaysay sa Banat News nga nakatabang kaayo ang sakyanan nga gihatag sa City Hall ilabi na nga usa ka bukirang dapit ang iyang barangay.
Sumala pa ni Malazarte nga habal-habal lang ang iyang sakyan kaniadto aron lang gyud makatikang sa City Hall sa pag-follow up sa iyang mga proyekto. - BANAT NEWS