CEBU, Philippines - Kritikal ang kahimtang sa 5-anyos nga batang lalaki kinsa mitabon sa iyang inahan nga gitigbas sa uyoan atol sa panaglalis sa duha tungod sa personal nga away sa pamilya sulod sa ilang pinuy-anan sa barangay Bantigue, Bantayan isla sa Bantayan niadtong Miyerkules sa alas 4:30 sa hapon.
Ang mga biktima mao ang 31-anyos nga inahan ug iyang 5-anyos nga anak kinsa gikatahong gipanigbas sa 45-anyos nga maguwang sa inahan sa bata (kansang mga pangalan gipugngan sa Banat News).
Ang biktima ug suspek pulos anak sa barangay kagawad sa maong barangay.
Matud pa ni PO3 Jesus Aguisanda, desk officer sa Bantayan Police dihang nahinabi sa Banat News base sa imbestigasyon nagkabingkil ang managsuon tungod sa ilang pagpuyo.
Sumala pa ni Aguisanda mipasangil hinuon ang suspek nga ang manghod niya maoy unang misuway og dunggab kaniya maong mikuha siya og sundang ug natigbasan niini ang manag-inahan.
Ang bata natigbasan sa ulo dihang migakos kini sa inahan nga niadtong tungora gikatahong naputos na og tinigbasan sa kalawasan ug kamot dihang gitigbas sa suspek.
Ang mga biktima gidala sa Bantayan District Hospital ug padayong gi-obserbahan sa mga doktor sa paghimo ning balita.
Ang suspek nadakpan kini atol sa hot pursuit sa kapulisan ug nabalhog na karun sa karsel samtang gihikay ang kasong ipasaka batok niya. (EIM) - BANAT NEWS