CEBU, Philippines - Duha ka ulitawo nga nagtangkil og armas de fuego nga walay lisensya ug kutsilyo nasikop sa kapolisan didto sa barangay Tabunok, dakbayan sa Talisay kagahapon sa kaadlawon.
Ang mga suspetsado giila sa kapolisan nga mao sila si Ronald Villanueva, 25, ulitawo nga taga Colis Street, barangay Tabunok, ug si Robert Abatayo, ulitawo usab nga taga sitio Tiguib barangay Lagtang sa mao gihapong dakbayan.
Sila si PO2 Roy Lofranco ug PO1 Edwin Campomanes nagpatrolya sa Tabunok sa maong higayon dihang nasigpatan nila ang mga suspetsado nga kadudahan kaayo ang lihok. Dihang ilang gisukit-sukit wala kaayo magkadimao ang tinubagan nga nakapasamot sa ilang katahap niini.
Hangtud nga gihinol nila ang mga kalawasan niini ug wala kini makakisi-kisi dihang nahikapan sa kapolisan sa hawak ni Villanueva ang .38 kalibre nga revolver, nga may duha ka buhing bala ug usa ka kabhang, samtang kutsilyo usab ang nasakmit sa kapolisan gikan sa hawak ni Abatayo.
Gisukit sa mga otoridad, si Villanueva wala makapakita og papeles sa iyang armas ug labaw na si Abatayo.
Gidala dayon sila ngadto sa buhatan sa Talisay City Police Office diin tua sila karon gitanggong samtang gihikay na ang tukmang kiha nga isang-at batok kanila. - BANAT NEWS