Gwen magdala'g grasya sa Camotes

CEBU, Philippines - Kapin sa P8.4 milyones nga financial assistance ang subling ihatag ni Governor Gwendolyn Garcia sa iyang pagduaw niining adlawa sa isla sa Camotes.

Kini human siya makaduaw sa miaging semana sa maong lugar ug mihatag og mga hinabang pinansyal sa mga kalungsoran nga nagpatuman og mga inprastraktura nga mga proyekto.

Ang gitakda niyang ihatag karon mao ang tag P50 mil nga SOCIO-CULTURAL ASSISTANCE alang sa 56 ka mga barangay sa lungsod sa Pilar, Poro, Tudela ug San Francisco.

Ang maong mga barangay sa nahisgutang mga lungsod makadawat usab og tag P100 mil alang sa ipanukod ug ipaayo nila nga mga day care center ug health   center.

Lakip usab sa nahisgutan nga kantidad ang P4.3 milyones nga hinabang pinansyal alang sa mga lokal nga kagamhanan sa pagpaayo sa mga gubaon nga karsada sa San Francisco, Poro, ug Tudela.

 Mo-inspection usab ang gobernador sa Pilar Circumferential Road ug mosubo usab sa gisementong mga kadalanan ingon man duha ka classroom nga eskuylahan.

Matud sa gobernador nga giganahan siya sa pagbalik-balik og suroy sa isla sa Camotes gumikan sa mga dagkong kalamboan sa palibot niini ug sa panginabuhi sa mga molupyo sa maong lugar. (BANAT NEWS)