Pagpagraduwar og anak matag pamilya gipangayo - PJ Garcia

CEBU, Philippines - Gitinguha ni 3rd District Congressman Pablo John PJ Garcia ug Governor Gwendolyn Garcia nga adunay graduwado sa kolehiyo sa matag pamilya dinhi sa lalawigan sa Sugbo.

 Sa iyang pagpamulong atol sa ownership meeting   sa Cebu CFI Community Cooperative didto sa lungsod sa Poro, Camotes sa miaging adlaw, gipahayag ni PJ nga sa nanglabay nga katuigan daghan kaayong mga pamilya nga wala gayud makapagraduwar og mga anak sa kolehiyo.

Nakita niya nga usa sa bug-at nga hinungdan niini mao ang kakabus nga halos wala nay makaon ang panimalay hinungdan nga maglisud sa pagpaeskuyla sa ilang mga anak. 

Si PJ kinsa mokandidato sa pagka-gobernador sa lalawigan sa Sugbo sa umaabot nga election mipadayag sa iyang kahinangop dihang nasayran niya nga 90 porsiyento sa mga gihuwaman sa mga miyembro sa Cebu CFI cooperative gigamit alang sa edukasyon sa ilang mga anak nga maoy iyang adbokasiya ug sa iyang igsoon nga gobernadora.

 Gipasabot ni PJ   ang kamahinungdanon sa edukasyon nga maoy angayang tutokan sa matag ginikanan aron molampos ang ilang mga   anak sa pagtungha ug mahimong propesyonal ugma damlag.

Gani iyang gipasalig ngadto sa mga mitambong sa ownership meeting sa Cebu CFI cooperative nga iyang ipadayon ang mga programa nga gisugdan na sa pagpatuman sa iyang igsoon nga gobernador   iniglingkod gyud niya isip gobernador sa lalawigan sa Sugbo. 

Usa sa ipadayon nga programa ni PJ kun siya mapili nga gobernador mao ang bahin sa edukasyon sa mga kabataan nga sa kasamtangan gihatagan og gibug-aton ni Gobernador Gwendolyn Garcia kinsa mokandidato usab sa pagka-senador.      (BANATNEWS)