CEBU, Philippines - Si Konsehal Bernard Odilao sa dakbayan sa Talisay miluwat og pasidaan pagpahunong sa quarry operation sa paryente ni Konsehal Choy Aznar sa barangay Lagtang sa maong dakbayan.Ang maong pasidaan gihimo ni Odilao atol sa regular nga sesyon sa konseho kagahapon sa buntag.
Matud pa ni Odilao sa mga taga media nga nasuta nila sa ilang pagsusi sa maong lugar nga ang mga dagkong tipak sa mga bato nangaligid didto sa sitio Tiguib gikan sa gikabkab nga lugar sa kabanay ni Aznar nga naghatag og peligro sa kinabuhi sa katawhan sa maong dapit.
Si Odilao nagkanayon nga ang konseho mipasar na og resolusyon nga nag-awhag sa mayor pagluwat og mando sa pagpahunong sa maong quarry aron paglikay sa disgrasya.
Kini luyo sa kamatuoran nga adunay permit gikan sa Provincial Environment and Natural Resources (PENRO) ang maong operasyon sumala pa ni Odilao.
Gawas sa paryente ni Aznar ang pamilyang Trinidad nag-quarry usab sa sitio Burlas.
Hinuon matud pa ni Odialo nga kining pagsuspenso sa maong quarry temporaryo lang kay ila kining pabalikon sa panahon nga dili na ting-uwan ug dili na dali nga manahili ang yuta ug mga bato gikan sa bakilid nga gikubkob.
Si Konsehal Aznar sa iyang bahin, miangkon nga ig-agaw sa iyang amahan ang nag-quarry sa Lagtang.
Apan matud usab ni Aznar nga gusto lang sutaon sa konseho ang operasyon niini ilabi na nga mideretso kini sa pagpangayo og permiso sa PENRO ug wala mananghid sa lokal nga kagamhanan sa Talisay.
Matud usab niya nga dili lang pagpangubkob sa mga bakilid nga lugar ang nahitabo sa Talisay kundi bisan ang pagpangubkob og bas ug graba sa sapa sa Mananga nagpadayon busa gipaabot nila ang aksyon ni Mayor Socrates Fernandez sa ilang resolusyon pagpahunong niini, dugang ni Aznar. (BANAT NEWS)