CEBU, Philippines - Gikatakda karong adlawa ang pagpahibawo ni Kongresista Eduardo Gullas kung kinsay iyang padaganon isip kandidato sa pagka-kongresista puli kaniya sa unang distrito sa probinsiya sa Sugbo sa sunod tuig.
Karong adlawa si Gullas kinsa naa na sa katapusang termino gipaabot nga mohingalan sa iyang anak nga si Gerald Anthony “Didi” Gullas o ba kaha sa iyang apo nga si Gerald Anthony “ Samsam” Gullas nga posibleng mopuli kaniya.
“Let’s wait tomorrow (karon). Dinhi nato mahibaw-an kung si kinsa nilang duha,” matud sa kongresista.
Sukad pa sa milabay’ng tuig si Samsam mitabang na kini sa mga outreach projects sa iyang apohan diha sa dakbayan sa Talisay ug ngadto sa ubang kalungsoran ug dakbayan sa unang distrito.
Si Samsam maoy assistant vice president sa finance and administration sa University of the Visayas ug team manager sa UV Green Lancers.
Niadtong tuig 2001 si Gullas mitanyag sa iyang anak nga si Didi nga modagan isip kongresista apan mibalibad kini tungod kay ang kamanghurang anak niining si Eduardo “Digul” Gullas III ang naa pa sa elementarya.
Gipaabot nga tambungan sa mga kaalyadong mayor, kapitan ug mga konsehales sa 2nd District ang tigom karon sa mga Gullas. (BANAT NEWS)