CEBU, Philippines - Gipanghingusgan sa kagamhanan ang kampanya nga nagpadasig sa mga inahan sa pagpasuso sa ilang mga masusong anak sa kaugalingon nilang gatas.
Ang Department of Health (DOH) isip maoy gipiyalan sa kagamhanan sa pag-atiman sa maayong panglawas sa kabataan sa nasud maoy nanguna sa maong kampanya pag-edukar sa mga inahan kalabot sa kamahinungdanon sa ilang gatas kay sa gatas sa hayop.
Si DOH7 Regional Director Asuncion Arden nagkanayon nga usa sa ilang gipasiugdahang kampanya mao ang pagpatuman sa balaod nga matag establisemento nga may mga kawani nga inahang nagtrabaho kinahanglang magbutang og lugar o sentro diin sila makapasuso sa ilang mga masusong mga anak.
Matud pa niya nga sa pagkakaron daghan pang mga inahan nga misalig sa mga gatas nga mapalit sa tindahan alang sa ilang mga anak.
Apan nagkanayon si Arden nga gawas nga mahal ang presyo sa maong matang sa gatas dili ikatandi ang kahimsog sa lawas sa bata nga mogamit niini kay sa mogamit sa kaugalingong gatas sa iyang inahan.
Nagtuo si Arden nga pinaagi sa mga barangay health workers, katudloan ang mga inahan sa kabarangayan nga mopabor sa pagsagop sa breastfeeding kay sa linata nga mga gatas sa tindahan.
Ang breastfeeding usa usab sa gipaila sa Reproductive Health Bill nga sa pagkakaron gikagubtan sa kongreso tungod sa kadaghang mga misupak niini. (BANAT NEWS)