Naga kuwang og classroom ug magtutudlo
CEBU, Philippines - Ang kakuwang sa mga classroom ug magtutudlo maoy dakong suliran nga giatubang karon sa Department of Education (DepEd) sa dakbayan sa Naga.
Si Rodrigo Talan, school coordinator alang sa physical facilities sa division sa DepEd mibutyag nga sa 26 ka tunghaan sa elementarya ug 20 sa sekondarya sa siyudad nasuta nga nagkinahanglan kini og 121 ka mga lawak klasehanan ang tanan.
Matud ni Talan nga niadtong Hunyo 4, 2012 sa pagbukas sa klase, ang publikong tunghaan sa siyudad may narehistrong 17, 676 nga gidaghanon sa estudyante sa elementarya ug 8,882 sa sekondarya.
Tungod sa kakuwang sa mga classroom, matag klase gisudlan karon og tag 65 ka mga bata.
Hinuon matud ni Talan nga ang division nangita og paagi nga masulbad ang maong problema.
Si Mayor Valdemar Chiong sa iyang bahin, nagkanayon nga ang kagamhanan sa siyudad nagpatukod og usa ka edipisyo nga eskuylahan nga may 29 ka mga classroom.
Si Chiong nagpadala og suwat ngadto kang Caridad Labe, Superintendent sa City School Division nga nag-awhag sa maong opisyal sa pagsumiter og summarized report sa gidaghanon sa mga estudyante ug magtutudlo sa elementarya ug sekondarya sa siyudad, aron maoy basehan sa kagamhanan sa lungsod sa angay nilang ipatukod nga eskuylanan.
Nagkinahanglan usab og dugang 17 ka mga magtutudlo ang Naga Central Elementary School. (BANAT NEWS)
- Latest
- Trending
