Roadside drug test magpadayon

CEBU, Philippines - Magpadayon ang pagpahigayon og road side drug testing sa mga drayber sa publikong sakyanan sa Land Transportation Office (LTO) 7 niining mosunod pa nga mga bulan.

Kini ang gipadayag ni LTO- 7 Director Raul Aguilos niadtong miaging adlaw nga nahinabi sa mga tigbalita kinsa mipahimangno sa mga drayber nga likayan na ang paggamit og illegal nga drugas aron dili sila masakpan. Gitataw niya nga ang ilang tumong sa pagpasiugda sa maong kalihokan mao lamang ang paghatag og kasiguroan sa mga pasahero.

Matud pa niya nga base sa mga pagtuon, usa sa mga hinungdan sa mga aksidente sa kadalanan mao ang paggamit sa ilegal nga drugas. Lakip sa mga hinungdan sa aksidente mao ang pagka-kaskasero sa mga drayber o reckless driving ug hubog nga nagmaneho ingon man ang pagpunay og text.

Ang target sa maong roadside drug testing mao ang mga drayber sa mga jeepney, bus, ug mga taksi. Niadtong panahon sa Semana Santa gihingusgan ang roadside drug testing nga miresulta sa pagkasikop sa kapin 20 ka mga drug addict nga mga drayber.

Ang masakpang positibo sa roadside drug test ipailawom pa sa confirmatory test, ang makompirmar nga nigamit og illegal drugs awtomatikong bakwian og lisensya ug dili na pamanehuon hangtud nga dili makapailawom sa rehabilitasyon. Samtang mas dako na ang bayad sa subli nilang paglukat og bag-ong lisensya itandi sa naandan agi og silot sa salaod nga ilang nahimo. (BANAT NEWS)