Mitulis sa pasahero tiklo

CEBU, Philippines - Nadakpan sa kapolisan sa miaging gabii ang mga suspetsadong mitulis sa mga pasahero sa PUJ niadtong Huwebes sa buntag sa dalan M.J Cuenco Avenue.

Ang mikagulkol na karon sa prisohan mao sila si Richard Tuñacao,19, ug Cheche Rondino Toring alyas ‘Ikong’, 31 kinsa nasikop sa mga sakop sa Criminal Intelligence Branch (CIB) sa ilang pinuy-anan sa sitio Kanipaan, barangay Carreta ning dakbayan sa Sugbo.

Nasakmit sa kapolisan gikan kang Toring ang usa ka .38 kalibre nga revolver.

Matud ni Chief Insp. Romeo Santander, hepe sa CIB nga tulo ang ilang nadakpan apan sila si Rondino ug Toring maoy giila sa mga biktima nga mitulis kanila.

Si Benie Sayson,35, taga Mc Arthur Boulevard, usa sa tulo ka pasahero nga nakuhaan og bag sa mga tulisan napusilan sa walang bitiis dihang mihana kini og sukol.

Ang laing duha nga nakuhaan og bag mao sila si Arnold Villanueva ug Melmarie Pajara pulos trabahante og pabrika.

Matud pa sa mga biktima nga nagsakay sila sa PUJ gikan sa Manalili padulong sa Mandaue, pag-abot nila sa unahan sa stop light sa Lorega, mipara ug misakay ang tulo ka mga lalaki, ang duha mikapyot samtang ang usa maoy misulod sa sakyanan dayon mition sa iyang armas de fuego ug mideklarar nga tulis .

Sa pagtuo sa suspek nga mosukol si Sayson gitirohan niini ang   walang paa sa biktima busa nalungag kini sa bala ug gipatambalan dayon sa hospital.

Gisang-at na ang tukmang kaso batok sa maong mga suspetsado.(/WC)  (BANAT NEWS)