Mata sa mananagat gituhog sa bawo

CEBU, Philippines - Napisok ang mata sa usa ka mananagat human kini natuhog sa sungo sa isdang bawo sa kadagatan sa barangay Mactan, dakbayan sa Lapulapu sa miaging kaadlawon.

Ang biktima mao si Victor Tampus, hingkod, nga nagpuyo sa maong dapit.

Matud pa sa mga nakasaksi nga ang maong hitabo wala ikataho sa mga sakop sa pamilya sa kapolisan tungod kay atua pa man kini sa tambalanan.

Ang pipila ka mga kauban nga mananagat sa biktima nga nahinabi sa Banat News miingon nga luwan sa iyang pamboat ang biktima ug nagpaingon na kini sa baybayon gikan sa iyang pagpanagat.

Apan sa diha na kini duol sa lapyahan kalit lang giluparan sa isdang bawo ang iyang nawong ug didto gyud motusok ang sungo niini sa tuong mata sa biktima.

Nakasinggit sa kasakit ang biktima ug dali kining gitabang sa ubang mga mananagat kinsa maoy mihatud kaniya sa Vicente Sotto Memorial Medical Center sa dakbayan sa Sugbo.

Matud pa sa mga nakasaksing mananagat nga wala hinuon nila hikit-i ang isda ug nagtuo sila nga nawakli kini ngadto sa dagat sa biktima. (BANAT NEWS)