Babayeng nagtagawtagaw giluba angol

CEBU, Philippines - Talandugon ang kahimtang sa usa ka dalaga human kini dunggaba sa bana sa iyang pag-umangkon didto sa barangay Sta. Cruz sa lungsod sa Ronda kagahapon sa alas 4:15 sa kaadlawon.

Ang biktima mao si Rosalina Sumampong, hingkod, dalaga, nga molupyo sa maong lugar, samtang ang suspek mao usab si Mario Bucog, 36, minyo, vendor ug bana sa pag-umangkon sa biktima.

Si PO2 Joselito De Aquino, desk officer sa Ronda Police Station mibutyag sa Banat News nga ang biktima nangadlawon pag-adto sa balay sa suspek diin nakiglalis kini sa iyang asawa. Gumikan sa kalangas nahigmata ang suspek niadtong tungora ug sa kalagot niini kalit nga mibangon og dayong lanit sa iyang kutsilyo dayon gidunggab ang biktima nga nagpunay ug tagawtaw sa maong higayon.

Nasabak sa walang bahin sa dughan ang biktima ug dali kining gitabang sa mga kabanay kinsa maoy mihatud kaniya ngadto sa Barili District Hospital apan gi-transfer dayon kini sa tambalanan sa dakbayan sa Sugbo.

Samtang ang suspek mitahan usab dayon sa kapolisan ug natanggong na karon sa prisohan samtang gihikay na ang tukmang kaso nga ipasaka batok niya.

Nasayran sa kapolisan nga dugay nang naglagot ang suspek sa biktima kay punayan lang kuno kini og hingilin gikan sa yuta nga ilang gipuy-an nga gipanag-iya sa pamilya sa iyang asawa. (BANAT NEWS)