Ginang mihimakak siya'y hinungdan sa sunog

CEBU, Philippines - Lig-ong gihimakak sa usa ka ginang ang pasangil nga didto magsukad sa iyang balay ang kayo nga miugdaw og kagatusan ka balay sa barangay   Luz sa miaging Biyernes sa hapon.

Si Carmen Villegas, 40, nga taga Sitio Sto.Niño 1 nagkanayon nga dili tinuod ang mga pasangil nga gihan-ok kaniya.

Apan si Edwin Olmilla, 48, usa sa nasunogan sa Sitio Sto.Niño 1 nga iyang silingan misumbong sa Banat News   nga didto gyud sa balay ni Villegas nagsugod ang kayo ug mikatay sa balay sa igsuon niini nga si Ramon Villegas.

Matud pa ni Olmilla nga mitabang pa siya sa pagpugong sa kayo aron dili makaabot sa ilang balay apan wala gayud kini mapugngi busa lakip usab nga naugdaw ang iyang pinuy-anan.

Apan si Carmen nagkanayon nga nagtan-aw siya og salida sa TV sa maong higayon dihang nakadungog siya og singgit nga may sunog ug nakita niya ang aso gikan sa balay sa iyang pag-umangkon.

Apan si Ramon nga iyang igsuon   mipamatuod nga didto gyud sa iyang (Carmen)     balay magsukad ang sunog.

Matud pa ni Ramon nga didto siya sa lungsod sa Alcantara kuyog sa iyang asawa sa maong higayon ug pag-abot nila sa barangay Luz abo na ang ilang balay.

Ang laing saksi nga si Quirico Mendez, 77, mitumbok usab nga gikan gyud sa balay ni Carmen ang kayo nga mitapon-tapon sa silingang mga kabalayan sa lima ka sitio.

Si SFO1 Nilo Daculan, Arson Investigator sa Bureau of City Fire Protection nagkanayon nga ilang imbistigahon ang mga nakasaksi ug ang gitumbok nilang si Carmen kansang balay maoy unang gikaon sa kayo.

Samtang hingpit na ang desisyon ni Mayor Michael Rama sa pagpatuman sa re-blocking aron may klarong mga karsada ang mga dapit nga nasunogan.

Usa sa hinungdan nga dugay nakamontar sa ilang hose sa tubig ang kabomberohan mao ang ka-walay kaagian sa ilang sakyanan niadtong Biyernes sa hapon sa pag-ulbo sa kayo didto sa barangay Luz. BANAT NEWS