CEBU, Philippines - Gidala sa iyang amahan ug igsuon kagahapon sa hapon ngadto sa Saint Mary’s Little Children Chapel sa barangay Tabunok, dakbayan sa Talisay ang 24-anyos nga babayeng giingong nasudlan og dautang espiritu sugod pa niadtong milabay’ng Huwebes sa kaadlawon.
Kahinumduman nga si Jessica Reyes, taga sitio Herbas, barangay Dumlog giingong nasudlan og dautang espiritu nga giingong usa ka lalaking bangason ug itomon nga naibog kaniya.
Kagahapon si Jessica nga nahinabi sa Banat News nagkanayon nga “Soccoro” ang pangalan sa lalaking kanunay’ng magpakita kaniya ug buot siya niining kuhaon.
Matud niya nga gipadamgo siya niini kagahapon sa buntag samtang natulog siya ug nangutana sa iyang birthday tungod kay duna kini ihatag nga regalo kaniya.
Pila ka minutos ang milabay human mahinabi sa tigbalita si Jessica mihangyo kining magpagapos ug kalit nga miliad, nangisog ug misulimbad ang mga mata ug kung sabligan og bendita mokalma kini.
Si Ulysis Ybañez, 31, taga sitio Miramar, Poblacion, Talisay nga sakop sa Cebu Paranormal Society kinsa usa sa nagpahigayon og pagtuon sa kaso ni Jessica nagkanayon nga nagpahigayon sila og imbestigasyon sa background ni Jessica diin usa sa ilang gilantaw mao ang psychological factor. Gipasabot ni Ulysis nga tungod sa mga personal nga problema o frustration sa kinabuhi mohuyang ang resistensiya sa lawas ug dali rang masudlan sa mga dautang elemento.
Matud ni Ulysis nga sa paranormal nga pagtuon susihon una nila ang background sa nabiktima una pa sila mohukom nga na-possess kini. (BANATNEWS)