CEBU, Philippines - Pormal nang ipanghatag karong adlawa sa kagamhanan sa siyudad sa Sugbo ang 21 ka condominium units diha sa karaang sam-ang sa barangay Lorega-San Miguel nga usa sa mga socialized housing project sa siyudad.
Ang maong mga condominium units mao ang unang batch sa maong proyekto ug laing 31 ka units ang kasamtangan pang gihimo sa maong dapit.
Moabot ngadto sa 60 ka pamilya nga nagpuyo kaniadto sa sulod sa maong sam-ang maoy benepisyaryo sa maong socialized housing project inabagan sa Department of Social Welfare and Development (DSWD).
Usa ka condo-type building giabagan sa Gawad Kalinga ug ni Kongresista Cutie del Mar nga gikuha sa iyang Priority Development Assistance Fund (PDAF).
Kahinumduman nga 362 ka mga nitso ang giguba ug gihabwa ang mga bukog ug giusa pagbutang sa gitukod nga bone chamber sa maong dapit. Ang Department of Social Welfare and Development (DSWD) maoy nagsuta sa mga tawo nga nahimong benepisyaryo sa nahisgutang proyekto.
Mihimo na usab og site tour kagahapon ang nagkadaiyang opisyales sa siyudad nga sila si Del Mar, Mayor Michael Rama, Konsehal Alvin Dizon ug sa representante sa Gawad Kalinga ug DSWD. Ang siyudad migastosog kapin sa P500,000 alang sa clearing operations sa sam-ang niini. (BANATNEWS)