Boutique sa usa ka mall gitulis tindera gipasok sa kasilyas
CEBU, Philippines - Usa ka boutique sa usa ka dakong mall sa barangay Apas sa dakbayan sa Sugbu ang gitulis ug ang nag-inusarang tindera gitanggong sulod sa kasilyas samtang gihimo sa mga tulisan ang krimen.
Ang nabiktima mao ang Clothes Minded Gift Shop nga girepresentahan sa tinderang si Richel Lusarito, 36, molupyo sa Yati, Liloan kinsa nadala sa tambalanan tungod sa nerbiyos ug pagsaka sa alta-presyon.
Base sa imbestigasyon sa kapolisan, mao pay pagpangabli ni Lusarito sa maong tindahan dihang kalit nga mipugos og sulod ang duha ka wala mailhing lalaki. Ang duha ka lalaki mideklarar og tulis dayong tutok kaniya og kutsilyo ug giguroy siya padulong sa kasilyas sa maong tindahan ug gisamaran sa liog.
Sumala pa sa Theft and Robbery Section sa Cebu City Police Office nadala sa mga tulisan ang P13,000 nga salapi gikan sa drawer sa maong tindahan.
Dali-daling miikyas ang mga tulisan human makuha ang maong kantidad.
Naglisod ang kapulisan pagsubay si kinsa ang mga tulisan tungod kay walay close-circuit television cameras ang maong mall ingon man ang mismong boutique.
Si Lusarito nga pwerteng lisanga sa kasinatian gidala sa tambalanan tungod sa samad sa liog niini. (BANAT NEWS)
- Latest
- Trending