CEBU, Philippines - Wala mabalaka ang One Cebu Party sa pagbalhin ni 6th District Representative Luigi Quisumbing ngadto sa Liberal Party (LP).
Gani matud pa ni Governor Gwendolyn Garcia nga maoy pangulo sa maong partido nga gawasnon ang atong nasud busa katungod sa nahisgutang kongresista ang pagpili kun asa siyang pundoka motipon.
Gipadayag usab sa gobernador nga dili pa usab panahon karon ang pagpadayag kung makapiang ba sa partido ang pagbiya ni Luigi.
Gani alang kang Kongresista Pablo John Garcia sa ika-tulong distrito sa lalawigan nga premature pa ang tanan busa dili pa masayran kun unsay epekto ngadto sa partido niining pagbiya ni Kongresista Quisumbing.
Midugang siya nga bisan kun mibuwag na kanila si Luigi, nagpabilin ang ilang maayong relasyon tali sa pamilyang Quisumbing.
Matud pa ni Kongresista PJ nga ang pagbalhin ni Luigi sa LP malagmit naggumikan sa hilabihang kasuod niya sa mga local leaders kinsa halos tanan nahisakop sa Liberal Party. (BANAT NEWS)