Horizon 101 makamulta

CEBU, Philippines - Gipaniguro sa Department of Environment and Natural Resources (DENR) 7 nga mamultahan ang tagdumala sa Horizons 101 Condominium Tower tungod sa pagkalusno sa ilang koral.

Sumala pa ni Ed Llamedo, information officer sa DENR 7 atol sa AGIO Forum kagahapon nga dili pa nila masiguro kung pila ang multa nga mabayran sa maong kompaniya tungod kay wala pa ikapahigayon ang technical conference alang niini.

Apan matud pa ni Llamedo nga matag kondisyon nga malapas sa maong kompaniya base sa gitakda sa giluwat kanila nga environmental compliance certificate (ECC) sa Environmental Management Bureau, may multa nga P50 mil.

Gipasabot ni Llamedo nga ang pagkalusno sa perimeter fence sa Horizon tataw kaayo nga usa sa mga kondisyon nga nalapas niini busa nagtangag na kini og P50 mil nga multa.

Sa laing bahin si Chief Geologist Al Emil Berador sa DENR 7 miingon nga ang ECC usa sa mga kondisyon nga gitakda sa Engineering Geological and Geohazard Assessment Report (EGGAR).

Ang ECC dili usa ka development permit kundi usa sa mga sistema nga nagtakda og mga kondisyon nga angay tumanon sa tag-iya sa unsa mang tukoron nga estraktura.

Pipila sa maong mga kondisyones mao ang pagsuta bahin sa kahimtang sa proyekto ug sa tarokan niini, kun dili ba kini mabahaan, dili ba humok ang yuta, ug ang katibuk-ang kondisyon sa palibot sa pagsiguro nga ang tukorong edipisyo dili malusno.

Usa sa gipakita sa DENR nga nakalapas sa kondisyon nga gitasar sa ECC mao ang kagamhanan sa lalawigan kinsa nakalapas og tulo ka kondisyon bahin sa ilang Roro project sa lungsod sa Cordova.

Tungod kay nakahangyo man ang kagamhanan og diskuwento nga tag P20 mil nga multa matag kondisyon nga nalapas, nahimo nalang P90 mil ang ilang bayranan gikan sa P150 mil unta nga katibuk-ang kantidad sa ilang bayranang multa nga pabayran kanila karong Abril 30, 2012. - Liezl Frasno, Correspondent/WC (BANATNEWS)