Uling way aso maoy ipagamit sa Larsian

CEBU, Philippines - Aron nga kapanalipdan ang panglawas sa katawhan ug sa mga kahayopan  sa Sugbu, gimando  ni Governor Gwendolyn Garcia sa mga stall holder sa  barbecue-han  sa Larsian nga pagamiton  sila  og  uling  nga dili moaso.

Matud  pa  sa gobernador  nga  ang  karne nga isugba sa ordinaryong uling maghatag og dakong hulga sa panglawas sa tawong mokaon niini kay  ang  aso makamugna  og carcinogen sa lawas sa  tawo nga maoy gikanan sa sakit nga cancer.

Gipalanog sa gobernador ang  iyang awhag atol sa gipahigayong tigum didto sa iyang buhatan nga  gitambongan ni Mac Azarcon, ang presidente sa Larsian Stall Owner’s Association uban si Astrohel Ybañez, ang Presidente sa Tabogon Ecological Management Association, Inc.; Provincial Legal officer manlalaban Marino Martinquilla; Provincial Planning Officer ug Provincial Engr. Adulfo Quiroga ug Provincial Treasurer manlalaban Roy Salubre.

Atol sa maong tigum gituki  ang bahin sa paggamit sa uling nga ginama sa taga Tabogon Ecological Management Association, Inc. diin ang nahisgotang uling gikan sa mga sanga sa kahoy ug bagol nga gipino ug gipulbos ug ginganlan og “charcoal briquettes.”

Si Ybañez,  nga nahinabi sa Sugbo News ug  Banat News team mipasabot sa kalainan sa maong matang sa uling  gikan  sa ordinaryong  uling tungod  kay kining  gipabrika  nilang  uling  sa bagol ug  kahoy mobaga  lang  og  deretso nga wala’y  aso.

Bisan  pa  kun tuloan  sa mantika  gikan  sa  isugba  nga  karne magbaga  lang  gihapon  ang  maong uling nga dili  gyud  moaso.

Gumikan  niini si  Azarcon,  nagkanayon nga andam sila nga mogamit niining ulinga aron  mawagtang  na  ang  aso  sa dapit  sa Larsian.

Sayo niini ang lalawigan sa Sugbo migasto og kapin sa P7 milyones kapin sa  pag-usab  ug  pagpatahom sa   Larsian Fuente  aron mahimo nga mahimong  ECO-Larsian. - (BANAT NEWS)