One Cebu Party andam na

CEBU, Philippines - Gihan-ay na sa One Cebu Party ang mamahimo nilang mga kandidato sa umaabot nga 2013 election.

Kini ang gitug-an ni Governor Gwendolyn Garcia, pangulo sa nahisgutang partido, sa mga sakop sa media dihang gipangutana siya bahin sa kalamboan sa politika dinhi sa lalawigan.

Matud pa sa gobernador nga nahisgutan na sa One Cebu Party ang preparasyon sa partido sa umaabot nga election ilabina sa position sa pagka-gobernador.

Apan sa pagkakaron dili pa nila hinganlan ang itugpo nilang kandidato sa pagka-gobernador sa lalawigan sa Sugbu.

Dugang pa ni Garcia nga ang ilang himoong gobernador mao kadtong kapiyalan nga adunay igong kapasidad ug kalidad bahin sa iyang katakus ug kapabilidad nga modaug, mopadayon sa mga programa nga iyang nasugdan ug labaw sa tanan, kasaligan.

Apan nagpabilin pa gihapon nga dakong question sa mga taga lalawigan sa Sugbu kung si kinsa ang mokandidato sa pagka-gobernador ubos sa One Cebu Party.

Hinuon miingon ang gobernador nga sa madugay ug sa madali ila nang ibutyag sa katawhan ang ituboy nga gobernador sa ilang partido.

Sa pagkakaron dili pa maoy tukmang panahon alang niini kay busy ang gobernador sa pag-atiman sa iyang katungdanan ngadto sa katawhan, niining iyang katapusang termino sa pangatungdanan, matud pa ni Garcia. - (BANAT NEWS)