CEBU, Philippines - Andam na ang tanan alang sa paglahugay sa 11 ka mga station commander sa kapolisan ning dakbayan sa Sugbo.
Mao kini gibutyag kagahapon ni Sr. Supt. Melvin Ramon Buenafe, hepe sa Cebu City Police Office.
Ang lakang ni Buenafe maoy iyang pagsanong sa awhag ni Mayor Michael Rama kinsa nagtinguha nga ma-reshuffle ang mga station commander sa onse ka police station kay iyang nakita nga wala na molihok ang uban sa ilang tagsa-tagsa ka Area of Responsibility.
Si Buenafe mitataw sa press conference kagahapon nga makaayo kini sa ubang mga opisyal alang sa ilang carrier development nga magganoy unya sa ilang promotion hangtod nga mahimo usab silang station commander.
Apan nakita usab niya nga dili kini makaayo sa mga station commander kinsa nasinati na kaayo sa mga lugar nga nadestinohan nila ug naka-establisar na sila og mga asset nga makahatag og impormasyon aron sa pagpakigbatok sa mga dautang elemento .
Giklaro ni Buenafe nga wala pa sila magkaestorya si mayor Rama kabahin ning maong revamp, apan iya nang gipaandam ang 11 ka mga station commander.
Matud ni Buenafe iyang dad-on ang maong isyu karong buntag sa ilang tigom sa Police Coordinating and Advisory Council (PCAC) sa Cebu City Hall.
Kini tungod kay matud pa niya nga mikibra ang Index Crime sa miaging tuig itandi sa tuig 2010 ug ning unang kuwarter sa tuig 2012 gumikan sa maayong performance sa kasamtangang mga station commander sa onse ka police station dinhi sa dakbayan.
Gani gipasalamatan ni Buenafe ang publiko sa dako nilang tabang ngadto sa kapolisan paghatag og mga impormasyon nga nakatabang sa dali nga pagresponde sa kapolisan sa mga alarma.
Lakip sa gipasalamatan niya ang mga sakop sa media gumikan sa dakong natampo ngadto sa publiko paghatag og impormasyon aron ang katawhan magbinantayon ug magmatngon nga dili sila mabiktima sa mga dautang elemento.(/WC) (BANATNEWS)