CEBU, Philippines - Mikapin sa usa ka gatos nga mga negosyanteng Sugboanon ang mitambong sa usa ka seminar kabahin sa pamatigayong export ngadto sa Australia ug New Zealand nga gipahigayon didto sa Parklane Hotel, sa barangay Banilad ning dakbayan sa Sugbo kagahapon.
Ang maong seminar nga gipasiugdahan sa Department of Trade and Industry (DTI) nga may ulohang Doing Business in Australia and New Zealand in Free Trade Agreement gitumong aron sa paghatag og higayon sa mga Sugboanon nga makapalapad sa ilang negosyo ngadto sa maong mga nasud.
Si Trade Commissioner Hernando Banal II, sa New Zealand Enterprise maoy mipadasig sa mga Sugboanong exporter nga mopalabang sa ilang negosyo ngadto sa New Zealand .
Si Banal nga lumad nga Filipino kansang pagkalungsoranon kun nationalidad nahimo na nga New Zealander nagkanayon nga sa upat ka milyon nga populasyon sa New Zealand , may 40 mil na ang gidaghanon sa mga Filipino didto karon.
Gitumbok niya nga ang mga negosyo nga pagkaon sama sa mga dried mango, dried banana, ug nagkalainlaing mga fruit preserved nga negosyo , mga fashion accessories, mga muwebles ug uban pa kinaham kaayo sa mga Filipino nga tua sa New Zealand ug mismo sa mga lumad nga New Zealander.
Ingon usab niini ang gipahayag ni Minister Counselor and Senior Trade Commissioner Anthony Weymouth sa Australia kinsa nagkanayon nga ang kagamhanan sa Australia gusto kaayong makigsuod sa mga negosyanteng Filipino.
Dili lamang aron usab sayon ang pagsulod nila og negosyo dinhi sa Pilipinas kundili ganahan kaayo sila sa mga Filipino tungod kay sama sa katarungan sa taga New Zealand, dali ra nilang ikasinabot sa negosyo, tungod sa kahaniti niini mosulti og English nga pinulongan.
Si Weymouth mitin-aw nga gumikan sa kasabotan sa Australia ug Pilipinas alang sa pagbukas sa gitawag nga free trade agreement, gituohan niya nga labing molig-on ang kadugtongan sa pamatigayon sa duha ka nasud alang sa ikauswag sa mga ekonomiya niini.
Ingon usab niini ang gipahayag nga paglaum ni Banal kinsa nanghinaot nga daghang mga Cebuano ug mga Filpinong negosyante ang makapahimulos ning maayong koordinasyon karon sa Pilipinas ug New Zealand. (BANATNEWS)