Tulisang mag-bike nadakpan

CEBU, Philippines - Nadakpan sa kapulisan ang duha ka lalaki nga gipasanginlang tulisan ug nakuhaa’g armas ug ginadiling drogas kagahapon sa buntag diha sa dalan Sanciangko sa barangay Kalubihan ning dakbayan sa Sugbu.

Ang nadakpan mao sila si Jaime Librado, 42, adunay kapuyo ug John Villegas, 32, pulos molupyo sa sitio Proper sa barangay Ermita ning dakbayan.

Si Sr. Insp. Eunil Avergonzado, hepe sa Carbon Police Station nga nahinabi sa Banat News nagkanayon nga sa wala pa siya moasumir isip hepe duha na ka semana ang nakalabay, iyang nasayran nga daghang nagpa-blotter sa ilang buhatan nga kasagaran mga babaye nga nabiktima sa tulis sa duha ka mga lalaking nagsakay og biseklita.

Matud ni Avergonzado nga iyang nakuha ang pattern sa duha ka mga lalaki diin kasagaran moigo diha sa ilang area matag buntag.

Kagahapon sa buntag iyang gimanduan ang iyang mga sakop nga magpatrolya ug nakit-an ang mga suspek nga kadudahan ang lihok nga nagsakay og biseklita hinungdan nga gipahunong ug gisita tungod sa nagbagal nga luyo sa usa kanila.

Dihang gikapkapan nakuhaan ang duha ka tagsa ka armas nga .38 ug .22 revolver nga may buhing mga bala. Si Villegas nakuhaan og usa ka pakete nga gidudahang shabu samtang si Librado drug paraphernalia.

Matud ni Avergonzado nga upat ka mga biktima nga mga babaye nga nagpa- blotter pulos nakuhaan sa ilang mga wedding rings nga dihang namalik sa ilang buhatan positibong miila sa mga suspek.

Gidugang niini nga ila pang paaboton ang laing tulo ka biktima.

Sa pakighinabi sa Banat News nila ni Librado ug Villegas kini miangkon nga sila maoy manulis nga magsakay og biseklita.

Si Librado nabilanggo na kaniadto sa Bagong Buhay Rehabilitation Center (BBRC) nga karun Cebu City Jail na tungod sa kaso sa ginadiling drogas samtang si Villegas nabilanggo na usab tungod sa kasong pagpanulis.

Ang duha kasamtangang gitanggong sa Carbon Police Station samtang gipaabot nga pasakaan og tukmang kaso ngadto sa piskaliya. (/EIM) (BANAT)