HRET mipalig-on sa kadaugan ni Lucy Torres-Gomez

CEBU, Philippines - Ang House of Representatives Electoral Tribunal (HRET) mipagawas na sa desisyon kabahin sa gipasakang electoral protest batok kang Leyte 4th district congresswoman Lucy Marie Torres-Gomez niadtong Huwebes (March 15), nga mipalig-on sa iyang pagdaog bisan kini usa ra ka ‘“substitute” tungod sa nakuha niining boto nga 24,701 batok ni Eufrocino Codilla Jr., ug sa lain pang kandidato nga nakakuha lang og 400 ka boto.

Sa gipadalang reaksyon pinaagi sa text message sa babayeng kongresista kini miingon “It has reaffirmed what everyone, except Winnie Codilla, already knew. I hope this puts the non-issue to rest so we can all move forward.”

Kahinumdoman nga si Cong. Lucy Torres-Gomez maoy gihimong substitute sa lugar sa iyang bana nga si Richard Gomez lima ka adlaw una pa ang eleksyon dihang kini na-disqualified sa Commission on Elections tungod sa rason nga “lack of residency requirements.” Nakugang nalang ang mga kaatbang ni Richard dihang gibakwi niini ang iyang apelar sa disqualification sa Comelec usa ka semana sa dili pa ang eleksyon hinungdan nga nahimong pinal ang maong desisyon apan iyang gibutang nga hulip kaniya ang iyang asawang si Lucy.

Ilawom sa Omnibus Election Code, ang usa ka kandidato mahimong magpapuli pinaagi sa tulo ka sirkumstansya: pagkamatay sa kandidato, kakulian sa panglawas nga makaapekto unya sa iyang trabaho kun kini mapili ug kun mipagawas na ang Comelec og final disqualification sa usa ka kandidato. Ang pag-withdraw ni Richard sa iyang apela maoy naghimong pinal sa desisyon maong makunsiderar nga legal ang pagpuli kaniya sa iyang asawa.

Si Lucy mihakot og 24,701 batok kang Codilla Jr. ug Silverio Tagolino sa labing unang automated polls sa nasud. Sila si Codilla ug Tagolino miprotesta sa kadaugan ni Lucy. (BANATNEWS)