Notadong kriminal gitumbok sa broadcaster slay try

CEBU, Philippines - Ginganlan sa kapolisan ang gipasanginlang notadong kriminal nga maoy gidudahan nilang suspek sa suway pagpatay sa radio blocktime host nga si Fernando “Kapid” Gabio niadtong Biyernes sa buntag.

Si Senior Supt. Marietto Valerio, city police director, mibutyag nga duha ka mga testigo mitudlo kang Eliseo Mabayag, ang giingong lider sa Magkal Group, nga mao ang tawong katulo ka higayon nilang nabantayang nagsige og sunodsunod kanila pipila ka semana na ang nakalabay una pa ang pagpamusil.

Matud pang Valerio ang duha ka testigos nga pulos pag-umangkon ni Gabio wala makaila sa pangalan ni Mabayag.

Si Senior Inspector Stephen Somosot, Jaro police chief, mibutyag nga usa sa mga testigo ang gipatan-aw sa police rogue’s gallery ug mitudlo kini sa hulagway ni Mabayag nga mao ang tawong nagsige og sunodsunod kanila niadtong Pebrero 6, 8, ug 10.

Human sa unang testigo gipatawag usab ang ikaduhang testigo kinsa mitudlo gihapon sa hulagway ni Mabayag nga mao ang tawong nagpunay og sunodsunod kanila kinsa migamit usab og motorsiklong parehas sa gisakyan sa mipusil sa biktima.

Miangkon hinuon si Valerio nga bisan kuwang pa sila og pisikal nga ebidensya nga magkonektar kang Mabayag sa pagsuway pagpatay sa brodkaster padayon pa usab nilang giila ang drayber sa motorsiklo ug ang look-out niini. (BANATNEWS)