Bantay Dagat wala'y budget

CEBU, Philippines - Gipadayag ni Bantay Dagat Task Force chief Ranulfo Sebusa nga adto na sila mangayo og budget sa buhatan ni Mayor Michael Rama sa nagkadaiya nila nga mga panginahanglanon tungod kay wala aprobahi sa konseho ang giduso niyang budget nga mokabat sa P9.3 milyones.

Nagkanayon si Sebusa nga bisan wala sila’y budget karong tuiga, magpadayon gihapon ang ilang mga operasyon ilabi na ang nga inadlaw-adlaw nila nga coastal clean-up.

Gipadayag hinuon ni Sebusa nga adunay mga importanteng butang nga ila unta nga gikinahanglan apan malagmit dili nila kini mabuhat tungod kay wala silay ikagasto niini. Usa sa ilang gikinahanglan matud ni Sebusa mao ang usa ka 30-footer nga speed boat nga gamiton nila sa pag-roving aron mapalapdan nila ang paggukod sa mga illegal nga mga mananagat.

Apan wala kini aprobahi sa konseho kauban sa 20 ka scuba diving equipment nga gikinahanglan usab nila nga nagkantidad og P1.5 milyones.

Sumala pa ni Sebusa nga importante kaayo ang mga ginamiton sa scuba diving gumikan kay mao kini ang gamiton sa pagmonitor usab sa mga kalihokan sa ilawom sa kadagatan.

Nagkanayon hinuon siya   nga ila una nga tan-awon unsay kagastohan niining P1 milyon nga gihatag nga budget sa Bantay Dagat Commission.

Samtang si Mayor Michael Rama mipadayag nga iyang paningkamotan nga magahinan og budget ang maong grupo.

Kini tungod kay alang sa mayor mahinungdanon kaayo ang papel sa maong pundok aron mapakgang ang illegal nga panagat   sa kadagatan niining dakbayan sa Sugbo. (BANATNEWS)