CEBU, Philippines - Usa ka mamaligyaay og butong ang gipusil patay sa wala mailhing tawo pasado alas- 8 sa miaging gabii sa barangay Panadtaran lungsod sa San Fernando.
Ang biktima nailhan nga si Teodulfo Mendez, 59, molupyo sa maong lugar.
Sa imbestigasyon sa kapolisan nasayran nga ang mamumuno gituohang nagpahipi sa ngitngit nga bahin atubangan sa balay sa biktima kinsa nabantayan sa anak ni Mendez nga si Reynaldo. Hinungdan nga dali kini niyang gisumbong sa iyang amahan apan sa pagsusi sa biktima sa lugar diin magpahipi ang maong tawo gidul-itan sa naulahi pagpusil ang walang dughan ni Mendez ug mikaratel og dagan. Ang biktima daling gitabang sa iyang pamilya ug gidala sa South General Hospital apan gideklarar kini nga dead on arrival.
Matud pa ni PO1 Cleofas Cabrera Jr. sa diha nga nahinabi sa Banat News nga adunay posibilidad nga kaatraso sa biktima ang mamumuno kinsa ilaha na karong gisubay. - BANAT NEWS