Mga magtutudlo sa Mindanao miduaw sa Kapitolyo
CEBU, Philippines - Si Governor Gwendolyn Garcia uban sa mga hepe sa departamento sa Kapitolyo mihatag og bulawanong mga kasayoran bahin sa pangagamhanan sa lalawigan sa Sugbo ngadto sa mga magtutudlo ug mga tinun-an sa Central Mindanao University sa University Town sa Musuan, Bukidnon kinsa tuyong mibisita sa Kapitolyo isip kabahin sa ilang educational tour dinhi sa Sugbo sa miaging adlaw.
Gipasabot sa gobernador ngadto sa mga Mindanaoanong bisita nga ang iyang administrasyon gipasubay niya sa 12- point agenda nga maoy silbing relis nga gilatas sa iyang pagdumala sa lalawigan.
Ang gobernador mihatag og higayon sa mga bisita pagpasupot og mga pangutana ngadto kaniya ug usa sa mga tinun-an nangutana kun unsa kahay sitwasyon sa lalawigan inigkatapos sa iyang termino isip gobernador.
Gitubag kini sa gobernador pinaagi sa pag-ingon nga nagtuo siya nga magpabiling malambuon ang lalawigan sa Sugbo bisan dili na siya ang gobernadora sanglit ang mitabang kaniya sa pagpalambo sa ekonomiya sa lalawigan sa Sugbo nga mao ang mga department heads sa Kapitolyo, mga mayor sa kalungsoran, mga barangay kapitan ug uban pang mga opisyal sa kalungsoran may kasayoran na sa maayong mga paagi. Samtang ang usa sa mga magtutudlo nangutana usab nganong lig-on kaayo ang iyang political will pinaagi sa paghimo og mga dagkong kausaban ug kalambuan sa probinsiya sa Sugbo.
Si Garcia mitubag nga kini naggumikan sa iyang kaikag nga makaserbisyo sa labing maayong paagi ngadto sa mga Sugboanon sama sa gihimo sagad sa pribadong kompanya nga mopalambo sa ilang tagsatagsa ka mga produkto ug serbisyo.
Gumikan niini nakadayeg kaayo ang mga bisitang mga magtutudlo ug estudyante kay natagbaw sila sa gipakitang performance sa pagdumala sa gobernador sa lalawigan sa Sugbo.
Alang kanila ang kalig-on sa liderato ni Gobernador Garcia sarang kaayo nilang himoon siyang idolo uban sa ilang panaad nga kun mokandidato kini sa pagka-senador sa umaabot nga election sa tuig 2013 andam sila sa pagsuporta niini. (BANAT NEWS)
- Latest
- Trending