10 natagak sa trak nangaangol

CEBU, Philippines - Napulo ka mga tawo ang nangaangol human natagak sa ilang gisakyan nga mini dumptruck diha sa nagkurus nga dalan sa Barangay Tubod ug Barangay Banhigan, lungsod sa Badian sa miaging adlaw.

Si Sr. Insp. Almirante Bacayo, hepe sa Badian Police Station, nagkanayon nga 40 ka mga tawo ang sakay sa maong trak nga may plakang SGC-884 ug gipanag-iya sa munisipyo sa Badian apan napulo niini ang nangatagak.

Ang mga biktima nga nalandig sa Badian District Hospital giila sa kapulisan nga mao sila si Cirilo Ramos, 41; Grace Ambrad, 20; Angelina Purgatorio, 41; ug duha ka buwang batang lalaki, Jerwin Commision; Felipe Cabungcag, 23; Carl Vincent Ambrad, 8; Silvestra Rotaquio, 49; Maylen Velarde, 28; Agustina Santianez, 50 ug Maria Magbanwa, 30, sila pulos mga residente sa Barangay Candiis.

Ang unang upat ka mga biktimang nahisgutan gibalhin sa sa Vicente Sotto Memorial Medical Center (VSMMC) sa dakbayan sa Sugbu tungod kay maoy nangagrabehan.

Matud ni Bacayo gimaneho ni Jose Dianon ang maong trak nga gikan sa usa ka kalihokan sa Barangay Tubod. Nagtuo si Bacayo ang ubang mga sakay wala makabantay nga natangtang ang lock sa luyong bahin hinungdan nga ang nagdasok nga nagsandig niini nangatagak. “Tungod tingali sa kadaghan sa sakay wala na mabantaying naduot tingale ang iron tube. Pasalamat lang gyud ta nga way nagsunod nga sakyanan labi na bus kay mas dako ang problema kung ugaling naa,” matud pang Bacayo.

Sa miaging tuig dunay gipalabang nga memorandum nga gidili na ang pagpagamit sa dumptrucks sa munisipyo nga pasakyan sa mga tawo ilabi na kadtong anaa sa bukiran nga mga lugar aron malikayan ang aksidente sa kadalanan tungod sa nahitabong aksidente nga mikalas og mga kinabuhi. Gisuwayan unta pagkontak ang buhatan ni Badian Mayor Robburt Librando aron kuhaan og reaksyon apan gikatahong out of town tungod kay duna kini gitambongang importanteng kalihokan. (BANATNEWS)