Sikyo nanio'g armas gipriso

CEBU, Philippines - Nagtingkagol sa Talisay City detention cell ang usa ka security guard kinsa giingong hubog ug nanion ug shotgun ngadto sa duha ka mga lalaki sa barangay Linao, dakbayan sa Talisay sa miaging Martes sa gabii. Ang suspetsado mao si Rolando Pejo, 45, taga barangay Mohon, sa nahisgutang siyudad ug nagbantay kini sa SMI warehouse sa Linao.

Samtang ang mga biktima mao sila si Benjie Sugarol, 28, taga sitio San Miguel, barangay Linao ug Rickson Cabusas, 29, taga barangay Lagtang, Talisay.

Ang tanod sa barangay Linao nga si Domingo Poncadas maoy mi-report ngadto sa mga polis kabahin sa maong hitabo.

Sila si PO1 Jued Enemecio, PO1 Cleo Ali Luntao, PO1 Sydney Alisoso ug PO1 Jupet Belleta maoy miresponde dayon sa maong alarma.

Didto naabtan sa maong mga polis si Pejo nga nagtion sa iyang shotgun nga dunay tulo ka buhing mga bala ngadto sa duha ka mga biktima.

Busa gi-disarmahan dayon siya sa mga polis ug gidala siya ngadto sa buhatan sa Talisay City Police Office pagpanubag sa imbistigasyon.

Ang imbistigador nga si PO2 Roy Lofranco sa pakighinabi sa Banat News kagahapon nagkanayon nga nakadawat sila og report nga si Pejo giingong nakainom ug nanion lang kini sa iyang shotgun ngadto sa mga biktima. (BANAT NEWS)