Gipusil sa nanaygon angol

CEBU, Philippines - Naangol ang usa ka 18 anyos nga lalaki human kini pusila   sa nagpakaaron-ingnong mga mananaygon kinsa nagdala og sako nga gisudlan sa armas de fuego didto sa barangay Alang-Alang , dakbayan sa Mandaue sa miaging Domingo sa gabii, adlaw sa Pasko.

Ang biktima mao si Ralfh Monsolin, ulitawo, nga nagpuyo sa maong dapit ug ang   nagpusil mao ang tulo ka wala hiilhing mga batan-ong lalaki. Si PO1 Earl Famador sa kapolisan sa Presinto 1 sa Mandaue City Police Office (MCPO) nga nahinabi sa Banat News miingon nag-inom pa ang biktima uban sa iyang uyoan sulod sa ilang balay. Unya miabot ang tulo ka kriminal kinsa nanganta pa og mga paskohanong awit nga giduyogan lang sa baba sa usa sa mga kauban sa grupo.

Dihang migawas ang biktima sa pagtubag sa sugo sa lawas kalit lang kining gipusil sa usa sa tulo ka mananaygon.

Naigo ang bukton niini ug nalibre ang kinabuhi kay nakadagan kini og balik sa sulod sa ilang balay.

Ang tulo kinsa nabalaka nga hiabtan    og polis nanibat dayon ug padayon pang gipangita sa kapolisan.

Gituohan nga ang pagdumot maoy hinungdan sa maong pagpamusil. - (BANAT NEWS)