Suspek sa pagpatay sa Banat reporter gipusil

CEBU, Philippines -  Talandugon ang kahimtang sa usa ka suspetsadong mipusil patay sa reporter ug photographer sa The Freeman ug   sa Banat News human kini pusila sa wala hiilhing kriminal sa tugkaran sa ilang balay didto sa Sitio Panukdokan, lungsod sa Dalaguete kagahapon sa alas 8:30 sa buntag.

Ang biktima mao si Edgar Belandres alyas Dodong, 47, minyo, ug nagpuyo sa maong lugar.

Ang mga saksi mibutyag sa kapolisan nga ang biktima naglingkod sa usa ka lantay nga kawayan sa ilang tugkaran nga nagpahayahay dihang miabot ang usa ka motorsiklo nga gisakyan sa duha ka wala hiilhing lalaki .

Ang nag-angkas sa likod sa maong motorsiklo maoy miluthang sa biktima upat ka higayon.

Si SPO1 Veronico Centino sa Dalaguete Police Station dihang nahinabi sa Banat News nagkanayon nga ang biktima bag-o pang migawas gikan sa ilang balay human mamahaw dihang gipusil.

Ang biktima naigo sa walang bahin sa lawas ug dali kining gibiyaan sa kriminal kinsa misakay pagbalik sa nagpaabot nga motorsiklo ug misirit pahilayo sa maong lugar.

Ang biktima daling gitabang sa mga silingan ug gihatud ngadto sa Cardinal Rosales Hospital sa lungsod apan gibalhin kini sa tambalanan sa dakbayan sa Sugbo tungod sa talandugon nga kahimtang.

Ang biktima maoy gisuspetsahang mipusil patay kang anhing Allan Dizon, photographer sa The Freeman ug reporter sa Banat News, niadtong Nobiyembre 27, 2004 sa dakbayan sa Sugbo.

Gumikan sa   kakuwang og mga saksi, wala mosaler ang kiha nga gisang-at sa mga tagtungod ni Dizon hinungdan nga wala makonbikto    si Belandres.

Gisuspetsahan usab nga personal nga bangi ang motibo sa pagluthang kang Belandres didto sa ilang lugar kagahapon gumikan sa giingong badlungon kini didto sa ilang dapit.

Hinuon wala kini konpirmaha sa kapolisan kinsa padayon pang nagpangita karon sa kriminal. (/WC)  (BANATNEWS)