30 ka batang libud-suroy gipa-eskuyla sa siyudad

CEBU, Philippines - Gipatungha karon sa siyudad sa Sugbu ubos sa Alternative Learning System (ALS) ang dul-an sa 30 ka mga street children aron duna sila’y makat-onan ug motaas ang level sa ilang grado.

Sumala pa sa hepe sa Cebu City Anti-Mendicancy Task Force nga si Isabelita Ganub nga klasehan kaduha sa usa ka semana ang mga bata nga nakaundang sa ilang pagtungha.

Matud pa ni Ganub nga dako kaayo og matabang ang ALS nga gidumala sa Department of Education (DPED) gumikan kay imbes maglaroy-laroy ang maong mga bata, moadto na lang kini ngadto sa ilang sentro aron duna sila’y makat-onan.

Ang maong mga bata gitagaan og libreng uniporme nga pormal nga giapod-apod gahapon sa buhatan ni Mayor Michael Rama.

“Kanang mga bataa, nakaundang na sila sa pag-eskwela, example, grade 5 ra sila kutob, kung makapasar sila sa exam , puwede na sila makatungtong deretso sa high school,” matud pa ni Ganub nga nahinabi sa Banat News gahapon.

Sumala pa ni Ganub nga importante kaayo ang edukasyon sa usa ka tawo gumikan kay usa kini sa pamaagi nga maluwas sa kalisod ug walay kalamboang maabot ang tawong wala niini.

Giawhag usab niya ang mga ginikanan sa mga bata nga gipaubos nila karon sa ALS nga motabang sa pagdasig sa ilang mga anak nga dili moundang sa ilang pagtungha. (BANAT NEWS)