Dalaga misukol sa rapist nadunggaban

CEBU, Philippines - Nadunggaban sa dughan ug uban pang bahin sa kalawasan ang usa ka 24-anyos nga dalagang misukol sa wala hiilhing lalaki nga misulay unta sa paglugos niini sa barangay Maslog, dakbayan sa Danao alas-10 pasado ang takna sa miaging gabii.

Ang biktima mao si Marilyn Lumanog, lumad nga taga barangay Poblacion sa lungsod sa Oslob ug nagtrabaho sa usa ka restaurant sa barangay Poblacion sa maong dakbayan.

Si SPO3 Ildefonso Prosia sa kapolisan sa maong dakbayan nga nahinabi sa Banat News miingon nga nag-inusarang naglakaw ang biktima gikan sa iyang trabaho paingon na pauli sa ilang balay dihang nahitabo ang suway paglugos kaniya.

Matud pang Prosia pag-abot sa awaaw nga lugar kalit gibabagan sa usa ka wala mailhing lalaki ang biktima ug gidiretso kini og bunlot daplin sa dalan dayong gakus ug halok niini.

Mikisikisi ang biktima ug nagpangwakli aron makabuhi dungan sa pagsinggit-singgit pagpangayo og tabang maong nasuko ang rapist ug gidunggab ang dalaga sa kalawasan makadaghang higayon.

Ang biktima bisan nakabaton na og samad dinunggaban sa iyang dughan nakigharong ug gisagang ang dugang pa nga mga pagdunggab nga maoy hinungdan mga samad niini sa bukton ug mga tudlo.

Dihang nakakita og kahigayonan midagan kini nga padayong nagpunay og singgit pagpangayo og tabang hinungdan nga mitalaw ang rapist kinsa mikaratil sad og dagan pag-ikyas. Ang biktima gitabang dayon sa mga kabanay ug gidala sa Danao District Hospital. (BANAT NEWS)