CEBU, Philippines - Giangkon ni Vice Mayor Marlon Garcia nga mayoriya sa mga opisyales sa lungsod sa Barili hugot nang misuporta kaniya ug sa One Cebu Party.
Kini human motapon ngadto sa Liberal Party si Mayor Mariñas nga maoy orihinal nga partido niini.
Matud pa ni Garcia ang tanang walo ka mga konsehal sa konseho sa lungsod sa Barili mipadayag na sa ilang pagsuporta kaniya.
Gawas sa mga konsehal, si Garcia miingon nga ang tanang mga barangay kapitan gawas lang sa tulo, anaa na usab mosuporta kaniya ug sa ilang partido.
Ang naangkong pasalig sa bise mayor natino dihang ang tanang mga opisyales sa maong lungsod gawas lamang ni Mayor Mariñas ug tulo ka kapitan mipirma na og manepisto nga nagdeklarar sa hugot niining pagsuporta sa One Cebu Party.
Si Governor Gwendolyn Garcia, maguwang ni Bise Mayor Garcia mipadayag usab sa iyang kalipay sa nahisgutang kalamboan kay ang partido nagpabiling lig-on didto sa Barili.
Si Vice Mayor Garcia gikatakdang mokandidato sa pagkamayor sa maong lungsod ug posibling ikaatbang niya ang kasamtangang mayor. (BANATNEWS)