Negosyante ugdaw

CEBU, Philippines - Patay ug naugdaw na sa kayo ang lawas sa   usa ka 59 anyos nga negosyante og kahoy human matagak sa pangpang ang gimaneho niining sakyanan ug mitugpa sa yuta nga mibuto ug nasunog didto sa Sitio Danas, barangay Cambanay, siyudad sa Danao niadtong Martes sa alas 5:00 sa hapon ug na-apil og kasunog ang 20 mil pesos nga iyang igpapalit og kahoy.

Ang biktima mao si Renato Jugan, 59, minyo, nga taga barangay Suba- Poblacion, lungsod sa Liloan, kinsa usa ka negosyante og kahoy.

Samtang ang iyang mga kauban nga naluwas mao ang iyang kapuyo nga si Chona Lucero, Charline Labrador, 18, ug Joshua Bontuyan, 5 anyos.

Si SPO1 Renante Manulat, traffic investigator sa Danao City Police mibutyag sa Banat News nga si Jugan ug iyang kapuyo ug duha ka mga bata paingon nga mangumpra unta og kahoy nga igsusugnod didto sa Cambanay.

Apan pag-abot nila sa dulhogon nga bahin sa maong lugar gipakanaog niini ang iyang kapuyo ug ang duha ka mga bata samtang gipaatras niini   iyang   gimanehong Toyota Tamarraw FX nga may plaka nga GDF-632.

Apan sa iyang pag-atras naligas ang tuong ligid   niini sa karsada kay nakaligis og bato   unya   kalit nga napawong ang makina ug nawad-an kini sa preno dayun miatras padung sa ubos. Hangtod nga natagak kini sa pangpang   nga may gilawmong 25 ka tiil.

Ang sakyanan mitugpa sa ubos nga naghayang dayong paka sa sipa kaayong buto nga misangpot sa pag-ulbo sa kayo, nga maoy miugdaw sa sakyanan.

Ang mga tinugyanan sa bombero sa maong dakbayan maoy mipawong sa kayo nga gisaksihan sa kapolisan ug mga sakop sa rescue team.

Napaig na ang lawas ni Jugan   dihang giugkat kini sa kapolisan apan gisuwayan pa nila pagdala ngadto sa tambalanan sa dakbayan sa Danao diin ideklarar kining    patay na.

Si Lucero nga kapuyo sa biktima mibutyag sa mga polis nga nalakip nga naugdaw    mao ang P20 mil nga ila untang igpapalit og kahoy sa maong  higayon.  - BANAT NEWS