Albularyo natripan gidunggab

CEBU, Philippines -  Nabulit sa mga samad dinunggaban ang lawas sa usa ka albularyo nga gidunggab sa giingong adik-adik sa dalan F. Ralota sa barangay Poblacion, dakbayan sa Danao, sa miaging kaadlawon.

Ang biktima mao si Celestino Mondero, 70, lumad nga taga lungsod sa Borbon ug nag-estambay sa maong dapit sa dakbayan sa Danao dihang na-tripingan sa usa ka Darrel Barbero, taga dalan Juan Luna sa barangay Poblacion sa nahisgotang dakbayan.

Si SPO2 Ildefonzo Prosia sa kapolisan sa maong dakbayan nga nahinabi sa Banat News miingon nga naglingkod ang biktima sa maong dapit dihang walay igong hinungdan giduol kini sa suspek ug gidunggab makadaghang higayon.

Ang biktima nga naigo sa dughan, tiyan, buko-buko, bukton ug uban pang bahin sa kalawasan dali nga gidala sa Danao District Hospital.

Ang suspetsado nadakpan sa follow-up operation ug kasamtangan karong gibalhog sa sulod sa ilang bilanggoan. Sumala pa nga ilado nang tiggamitan og ilegal nga drugas ang suspek ug makadaghan na nila kining nadakpan kaniadto. (EIM) (BANATNEWS)