TUCP misuporta sa PALEA

CEBU, Philippines - Ang Trade Union Congress Party (TUCP Party-List) lig-ong misuporta sa welga nga gilusad sa mga membro sa Philippine Airlines Employees Association (PALEA) agi og   protesta sa ilang kasagmuyo sa pagpanangtang sa mokabat og 2,600 ka mga empleyado gikan sa ilang trabaho.

Si Kongresista Raymond Democrito C. Mendoza sa TUCP Partylist sa iyang opisyal nga pamahayag nga gipadangat sa Banat News miingon nga ang welga nga gihimo sa mga apektadong trabahante usa lamang ka pagpadayag sa lihitimo nilang katungod   batok sa lakang sa pagtangtang kanila gikan sa trabaho.

Matud ni Mendoza nga ang lakang sa tagdumala sa PAL sa pagpanangtang sa iyang mga trabahante usa ka dakong paglapas sa ilang collective baragaining agreement (CBA).

Nasayran nga gusto sa tagdumala sa PAL nga ilisan ang mga trabahante niini og laing grupo sa mga mamumuo nga maghaw-as kanila gikan sa ilang tulobagon sa paghatag og mga benepisyo ug pribilihiyo sa ilang mga trabahante.

 Matud pa ni Mendoza nga nanukad kining tanan sa dili takdong pagtuman sa tagdumala sa PAL sa balaod bahin sa pamuo nga nakalapas    og dako   sa katungod sa mga mamumuo, matud pa ni Mendoza.

Midugang siya nga kun suportahan sa Malacañang ang tagdumala sa PAL nagpasabot lamang nga wala nila hatagi og gibug-aton ang katungod sa mga mamumuo.   - BANAT NEWS