Namatay atol sa b'day

CEBU, Philippines - Maayong pagkabuak sa ulo ug namatay ang usa ka lalaking nagsaulog sa iyang adlaw’ng natawhan samtang naangol ang duha ka kauban niini human sila mosampak sa sementadong poste sa Visayan Electric Company kagahapon sa kaadlawon sa dalan N. Bacalso, South Road Holy Cross barangay Basak ning dakbayan.

Ang namatay mao si Norbert Tecson, 28, molupyo sa Sudlon, Lahug samtang ang iyang angkas nga iyaha rang kabanay nga si Perryvan Tecson, 35, molupyo sa dalan Escario barangay Camputhaw.

Si PO3 Armando Bañoc ang imbestigador sa maong aksidente base sa ilang nakuhang impormasyon nga birthday ni Norbert kagahapong adlawa.

Sa imbestigasyon sa Cebu City Traffic Division nasayran nga si Tecson nagmaneho sa Honda XRM nga adunay plakang 6745-KC patubang sa habagatang bahin angkas si Perryvan.

Sa diha nga naabot sila sa maong lugar kalit nawad-an og kontrol sa motorsiklo si Norbert ug nalahos sa sementadong poste sa Visayan Electric Company (VECO).

Tungod niini giingong nabuak ang ulo ni Norbert nga miresulta sa hinanali niining kamatayon samtang nalagpot si Perryvan sa sementadong dalan nga miresulta usab sa pagkabali sa iyang kabukogan.

Si Perryvan daling gidala sa Cebu City Medical Center.

Sa pakighinabi sa Banat News ni PO2 Wilfredo Caperida, mibutyag kini nga ang dalan nga giagian sa motorsiklo nga gisakyan sa duha ka biktima aduna pay lama sa pag-brake niini ug gituohan niyang nag- over speeding kini.

Matud pa ni Caperida nga posibleng kusog ra kaayo ang pagpadagan ni Norberto hinungdan nga nawad-an na og control ang drayber. (EIM) (BANATNEWS)