Babayeng 'bugaw' gibirahan patay

CEBU, Philippines -  Patay ang usa ka babayeng giingong ‘bugaw’ sa Kamagayan human pusila sa duha ka armadong lalaki samtang naglakaw kagahapon sa udto diha sa sitio Laguna sa barangay Cogon-Pardo siyudad sa Sugbu.

Si SPO4 Rey Cuyos, imbestigador sa Homicide Section sa Cebu City Police Office (CCPO) nga nahinabi sa Banat News miila sa biktima nga mao si Estrella de Leon, 40, nagpuyo sa barangay Kamagayan ning siyudad ug giingong ‘bugaw.’

Duha ka lalaking nagsakay og motorsiklong kolor itom ug pula maoy gitumbok nga mipusil sa dughan, tuong kilid sa lawas ug duha sa bukobuko sa biktima nga hinungdan sa kamatayon niini.

Nakuha sa kapulisan sa crime scene ang usa ka kabhang sa .45 nga kalibre sa armas. Si Cuyos miingon nga gikan mibisita ang biktima sa igsuon nga si Fe diha sa maong dapit.

Gisubay karon sa kapolisan ang kalambigitan sa ilegal nga drugas. (BANAT NEWS)