CEBU, Philippines - Patay diha-diha ang usa ka 23 anyos nga estambay human pusila atubangan sa iyang mga barkadang iyang kainom didto sa sitio Upper, barangay Lanao lungsod sa Moalboal niadtong Domingo sa alas 3:30 sa hapon. Ang biktima mao si Wilson Yosoris, 23, ulitawo, molupyo sa nahisgutang lugar ug walay trabaho busa kanunay lang giingo’g nag- estambay.
Samtang ang suspek mao ra usab ang iyang silingan nga si Wilmer Castillo, 30 anyos, ulitawo.
Si PO2 Edwin Illut sa Moalboal Police Station mibutyag sa Banat News nga ang biktima nakig-inom sa iyang mga barkada niadtong tungora dihang ang suspek kalit lang miabot ug gipusil ang biktima nga nagtalikod.
Naigo sa bukobuko ang biktima , apan matud pa sa mga nakasaksi nga human mopaka ang buko-buko niini mikalit pa og barug ang biktima dayong dagan apan gigukod kini sa suspek ug dihang naapsan didto sa usa ka umahan giusban pa og pusil hinungdang nahagba kini sa yuta dayong kabugto sa kinabuhi.
Apan samtang misuway og ikyas ang suspek, nasakpan kini sa uyoan sa biktima ug giligid og bato hinungdan nga maayong pagkapusa sa dagway niini apan nakadagan pa gyud ug hangtod ning pagbalita padayon pa ang manhunt operation sa kapolisan niini.
Nasayran usab sa kapolisan nga panagdumot ang motibo sa maong pagpamusil. - (BANAT NEWS)