CEBU, Philippines - Nasikop sa kapulisan atol sa buy bust operation ang gitumbok nga idlas nga level two drug pusher sa lungsod sa Balamban niadtong Biyernes sa alas 9:35 sa gabii didto sa barangay Abucayan.
Ang nasikop mao si Oliver Sanchez, 35, molupyo sa sitio Lakdon barangay Aliwanay sa maong lungsod human makuhai og tulo ka paketeng may sulod nga gidudahang shabu ingon man ang P500 nga marked money sa kapolisan.
Nakuha usab kaniya ang usa ka kalibre .38 nga armas nga dunay lima ka buhing bala nga walay lisensiya ug P3,590 nga gituohang halin sa pagpamaligya sa maong ginadiling drugas.
Matud ni PO2 Cesar Climaco sa Balamban Police Station dihang nahinabi sa Banat News nakadawat sila og impormasyon kabahin sa kalihukan sa suspek hinungdan sa gilusad nga buy bust operation nga miresulta sa pagkasikop sa suspek. - (BANAT NEWS)