CEBU, Philippines - Si Konsehal Nida Cabrera maoy ipadala sa kagamhanan sa siyudad sa Sugbo alang sa usa ka semana nga pagbisita ngadto sa West Germany aron pagtuon sa solid waste management program sa maong nasud.
Si Cabrera kinsa mao usab ang chairman sa committee on environment sa konseho mipadayag nga importante kaayo ang maong biyahe niya ngadto sa West Germany kay ang makapkap niyang kasayoran didto bahin sa tukmang paghipos sa basura maoy sundogon ug ipatuman usab dinhi sa dakbayan sa Sugbo.
Ang siyudad sa Sugbo kasamtangang mipatuman sa “No Segregation, No Collection Policy” nga gihulagway ni Cabrera nga epektibo kaayo.
Kini tungod kay matag usa ka balay ug establisamento naningkamot nga magpabiling limpiyo ang ilang tagsatagsa ka palibot. Samtang nagpadayong aktibo karon ang operasyon sa City Environmental Sanitation Enforcement Team (CESET) sa paggukod sa mga tawo nga magpataka og labay sa ilang mga basura sa publikong lugar.
Walay hunong usab ang mga Barangay Environment Officers (BEO) sa pagsuroy-suroy sa tagsa-tagsa nila nga hurisdiksyon pagsusi kun mituman ba ang mga tawo sa hustong pagbahig sa basura sa malata ug dili malata. - BANAT NEWS