CEBU, Philippines - Si Governor Gwendolyn Garcia ug si 3rd district Congressman Pablo John “PJ” Garcia nga iyang igsoon mipadayag nga andam silang motabang sa mga biktima sa aksidente sa lungsod sa Barili nga mikalas og 10 ka tawo ug miangol og laing 50 ka molupyo niadtong Huwebes.
Kini pinaagi sa pag-abaga nila sa mga gastohanan sa hospital ug sa mga tambal niadtong mga naangol, ug burial assistance alang sa namatay nga mga biktima.
Gibutyag ni Congressman Pablo John sa mga sakop sa media ang maong tabang human sa ilang pagbisita sa mga naangol didto sa Vicente Sotto Memorial Medical Center.
Matud pa ni Congressman Pablo John nga nagkasabot na sila si Gobernador Gwen sa pagtubag sa mga galastohan sa hospital ug sa pagpalubong sa mga nakabsan sa kinabuhi aron wala nay angayang kabalak-an ang mga kabanay niini.
Ang Provincial Social Welfare and Development Office sa Kapitolyo maoy gitahasan sa gobernador sa pag-abalo sa mga galastohanan sa tambalanan ug sa mga medisina alang sa mga naangol ug sa gastohanan sa paglubong alang sa mga namatay.
Ang gobernadora miingon nga iya na usab nga nahatud ngadto sa pamilya sa mga biktima ang mga canned goods ug tag-usa ka sakong bugas isip pasiunang tabang sa kagamhanan sa lalawigan sa Sugbo kanila. (BANATNEWS)