Amahan ug anak gisalbar sa bombero

CEBU, Philippines - Usa ka 7-anyos nga batang babaye ug ang amahan niini kinsa natanggong kagahapon sa baha sa pagbunok sa kusog nga uwan ilawom sa tulay sa Taboan ug Panganiban, dakbayan sa Sugbo naluwas sa kabomberohan.

Ang mga natanggong mao si Edwin Saldua, 46, ug ang anak niining si Christine 7, mga residente sa Taboan, barangay San Nicolas, dakbayan sa Sugbo.

Si City Fire Marshal Anderson Comar nga nahinabi sa Banat News kagahapon mibutyag nga alas 2:15 sa hapon nadawat nila ang alarma bahin sa amahan ug anak nga namasura   ilawom sa tulay.

Dihang mibunok ang kusog nga uwan daling mipatong ang duha sa medyo buntod nga lugar ilawom sa tulay.

Apan mitubo ang tubig sa sapa ug mibul-og ang baha hinungdan nga mihilak na pag-ayo ang bata sa kahadlok nga maanod sila .

Si Comar mibutyag nga ang mga tawong   nakabantaty sa batang naghilak maoy mitaho ngadto sa kabomberohan.

Matud ni Comar   milihok dayon sila sa pagluwas sa amahan ug anak pinaagi sa pagtunton og pisi   nga gihikot nga gipahikot sa ilang lawas ug gibitad kini nila sa ibabaw ug nasalbar ang duha.

Sa laing bahin, 20 ka mga pamilya ang napagngan og suga human matumbahi sa kahoy nga ipil-ipil ang main line sa Visayan Electric Company (VECO) sa sitio Tayud, barangay Basak- Pardo, dakbayan sa Sugbo.

Si Kapitan Dave Tumulak sa nahisgutang barangay nga nahinabi sa Banat News nagkanayon nga tungod sa pagbunok sa uwan kalit nga natumba ang maong punoan sa kahoy hinuon walay mga balay o tawo ang naigo niini.

Gibutyag ni Tumulak nga gipa-cordon dayon niya sa iyang mga sakop ang dapit aron walay makaduol paglikay sa disgrasya tungod kay   buhi pa sa maong higayon ang linya sa kuryente.

Si Ethel Natera sa VECO nga nahinabi sa Banat News kagahapon nagkanayon nga daghan sila og giatiman kagahapon tungod kay adunay daghang linya sa kuryente   nga napawong tungod sa kusog nga uwan.

Sa laing bahin nailhan na   nga usa ka Claudia Medalla Baculi, 77, taga sitio Bay-ang, barangay Babag 2 ning dakbayan sa Sugbo ang usa ka tiguwang babaye nga naanod sa baha ug nabangalang patay na   didto sa barangay Tinaan,   dakbayan   sa Naga niadtong Domingo.

Si Marites Baculi Lopez, hingkod, nga anak sa biktima mibutyag nga   sa sayo pa, ang biktima miduaw sa paryente niini sa   Tres de Abril, sa dakbayan sa Sugbo, apan miadto kini sa Naga nga naglakaw lang kay wala kini kuwarta niadtong Domingo diin didto masugati niini ang disgrasya apan wala nila hisayri kun nganong naanod kini sa baha. (BANAT NEWS)