CEBU, Philippines - Samdan ang uyoan ug pag-umangkon hman sila lubaa sa ilang kontra didto sa sitio Apple, barangay Cogon -Pardo, ning dakbayan sa Sugbo sa miaging gabii. Ang mga biktima mao sila si Junbell Abello, 27, usa ka kusinero sa usa ka restaurant ning dakbayan, ug ang iyang pag-umangkon nga si Rizaldo Siaton, 25, pulos taga Cogon.
Samtang ang gitumbok nga suspetsado nailhan lang sa ngalang King, nga ilang silingan.
Nasayran sa kapolisan nga sa wala pa ang hitabo, si Abello uban sa iyang mga barkada nag-inom sa usa ka tindahan sa maong lugar.
Unya ang suspetsado nga dugay na niyang gikabangi miabot busa giduol kini ni Abello kay gusto siyang magkauli sila sa maayong kabubut-on.
Apan, napakyas siya kay nasuko man hinuon ang suspetsado busa nagkalalis sila hangtod nga miabot, si Siaton nga pag-umangkon ni Abello.
Sa pagkakita niining milanit na sa kutsilyo ang suspek kay duslakon si Abello, kalit nga miduol si Siaton aron uwangon ang duha, apan gihansakan usab siya sa kutsilyo.
Human sila masamari sa nagkalainlaing bahin sa ilang lawas, mesirit dayon ang suspek, samtang ang mga biktima gihatod dayon ngadto sa Cebu City Medical Center sa dakbayan sa Sugbo.
Padayon pang gipangita sa kapolisan ang suspek. - BANAT NEWS