CEBU, Philippines - Nagtingkagol karon sa prisohan ang usa ka tag-iya og lending firm human kini hidakpi sa kapolisan kay gisumbong nga nanglugos sa iyang trabahante didto sa barangay Centro, dakbayan sa Mandaue niadtong Huwebes sa gabii.
Ang biktima nga nagpangidaron og 29, minyo, taga barangay Tipolo sa maong dakbayan, ug supervisor sa maong lending firm.
Samtang ang suspetsado nga nag-pangidaron og 47, minyo, nga taga barangay Jagobiao, maoy tag-iya ug manager sa usa ka lending firm sa barangay Centro sa maong dakbayan.
Nasayran nga ang biktima paatubang na unta nga mouli dihang kalit lang kuno siyang gigunitan sa suspetsado ug gitukmod paingon sa bongbong sa ilang buhatan.
Sa diha nga napriso na ang biktima sa mga kamot sa suspetsado ug maayong pagkapilit sa bongbong nagsugod na ang suspetsado og halok kaniya ug gihuboan na kini sa senina.
Apan ang suspetsado wala matagbaw nga nagbarog lang sila giguyod niini ang biktima ngadto sa sopa ug gipahigda kini.
Apan ang biktima nga naghayang na wala kawad-i og kaisug ug kalit nga gisikaran sa iyang mga tiil ang kinatawo sa suspetsado nga mikiat na sa pag-arangkada aron unta modimdim sa iyang katam-is.
Gumikan sa kasakit miku ang suspetsado ug didto nakabangon ang biktima dayong punit sa iyang senina ug mikaratel og dagan sa gawas sa ilang buhatan.
Pag-abot sa ilang balay gisumbong dayon niya ang nahitabo kaniya sa iyang bana ug gipadangat usab dayon nila sa kapolisan
Ang kapolisan wala usab maglangan ug didto naabtan nila ang suspetsado sa iyang buhatan ug ila dayon kining nasikop.
Nagkagulkol na karon sa Mandaue Police Station 1 ang suspetsado samtang nagpaabot sa kihang isang-at batok kaniya sa biktima. (BANAT NEWS)