Lola gidasmagan sa polis kritikal

CEBU, Philippines - Nalandig sa tambalanan ang usa ka lola human kini dasmagi sa   motorsiklo nga gimaneho sa usa ka polis didto sa sitio Tambacong sa barangay Calmante sa lungsod sa Tudela isla sa Camotes sa miaging buntag.

Ang biktima giila sa kapolisan nga si Aniana Desabille, 73, biyuda ug residente sa maong lugar, samtang ang polis nga nakadasmag giila usab nga si PO2 Salvador Viadal Lincopines, 30, minyo, ug nagpuyo sa barangay Puertobello sakop sa naasoy’ng lungsod.

Segun sa taho sa kapolisan, ang nahisgutang polis nagmaneho sa iyang kolor pula nga motorsiklo ug angkas niini ang iyang ugangang babaye nga si Shem Belarmino nga paingon nang mopauli sa ilang pinuy-anan.

Apan pag-abot sa nahitaboan ang biktima kalit lang nga milabang sa karsada apan kay nakabantay siya nga adunay nagsingabot nga motorsiklo miatras ug mibalik siya sa daplin       apan ang polis nga wala makapreno sa iyang sakyanan midasmag gyud sa biktima.

Gumikan sa kakusog sa pagkadasmag, nalagpot ang biktima ug nakaangkon kini og grabeng bun-og ug samad sa kalawasan.

Gisakwat dayon sa polis ang biktima ug gihatod ngadto sa Ricardo Maningo District Hospital sa lungsod sa San Francisco apan gibalhin kini ngadto sa Vicente Sotto Memorial Medical Center (VSMMC) sa dakbayan sa Sugbo.

Samtang ang polis bulontaryong mitahan sa iyang kaugalingon ngadto sa mga kauban niyang otoridad didto sa Tudela. (BANAT NEWS)