Hubog nga polis ipapriso sa SPEED

CEBU, Philippines - Ang hepe sa Squatters Prevention Encroachment Elimination Division (SPEED) mibahad kagahapon nga dili niya lung-an ang usa ka hubog nga polis nga namun-og sa iyang mga tawo nga didto sa dalan sa Mango niadtong Lunes sa alas 11:00 pasado sa gabii hangtod nga madubok   kini sa prisohan.

Sumala ni Noel Artes, hepe sa SPEED nga papanubagon gyud niya si PO1 Darwin Melodia nga nadestino sa Tuburan Police Station pinaagi sa pagpasaka og kaso niini sa korte gumikan sa pagpamun-og ug pagpanghulga niini ngadto sa iyang mga tawo.

Nasayran gikan kang Artes nga si Melodia kalit lang miduol sa mga sakop sa SPEED nga mingsita sa mga street vendor nga nakabalda sa dalan Mango Avenue ug nagyayaw kini nga nangitang kopya sa ordinansa.

“Iyang gihulga ang akong mga tawo nga mosakay siya og taxi aron mokuha og armas. Wala kuno siya’y paki, bahalag taga City Hall akong mga tawo,” sumala pa ni Artes.

Giingong nakabaton og grabeng pangos sa tiil ang usa ka sakop sa SPEED nga si Ruel Basoy human kini bunlota ni Melodia.

Dugang pa niya nga gikulata pa gyud sa polis ang laing sakop sa SPEED nga si Sandynel Espinosa hinungdan nga nabun-og pag-ayo ang bukton niini.

Nasayran sa Banat News nga gibuhian na sa Fuente Police Station si Melodia kagahapon sa hapon gumikan kay napupos na ang reglamentary period apan ang kampo sa SPEED dili gyud mohunong hangtud mabalhog pagbalik sa prisohan ang hubog nga polis.

Samtang sa bahin ni Melodia, gipanghimakak niini ang   pasangil sa SPEED ug nangatarungan   nga igo lang kuno siyang nangutana sa taga SPEED ug wala gyud siya manghilabot ngadto sa mga sakop niini. (WC) (BANAT)